Uswärtsfahrte

Ou ir Saison 2025/26 fahre mir wider mitem Summer Car ad Uswärtsfahrte. Damit mir di Fahrte mitemne schwarze Null chöi dürefüehre, ischs ou die Saison so, dass mindestens 20 Lüt pro Fahrt müesse mitcho, süsch fahrt ke Car. Für Mitglieder chostet d Fahr häre u zrügg 30.- u für Nid-Mitglieder 40.–. Uf Bärn fahre mir nach wie vor nid, wüus z nach isch u dert aui säuber chöi häre cho. Wär sich grad us Nöimitglied amäudet und dr Mitgliederbitrag no im Car zaut, cha ab sofort vo de günstigere Prise profitiere.

Amäude chasch di nur über das Formular hie. Amäudige über privati Nummere vo Vorstandsmitglieder wärde nid berücksichtiget. Das isch ganz wichtig, wüu mir so aune di gliche Chance wei gäh und zudäm chöi mir so d Organisation uf mehreri Schultere verteile, wüu mehreri Lüt das chöi betröie.

Im Car gits jewils chlini Snäcks und Getränk z choufe. Es isch ja klar, dass Persone, wo chum meh chöi grad stah und es Risiko für d Suberkeit vom Car darsteue, nid dörfe mitfahre. Setigi Lüt chöi ou spontan ufem Wäg vor Fahrt usgschlosse wärde.

Das Jahr gits verschideni Spezialfahrte: am Samschti, 27. Septämber uf Chlote gits e Chinderfahrt mit SChminke, Ballön u Tigermaskottli im Car. Am Samschti, 25. Oktober gits e Fahrt uf Davos, wo mir am Morge losfahre, so dass du när no chli Davos chasch erkunde u de am Abe a Mätsch gah. U di dritti Speziaufahrt fingt am Samschti, 24. Januar statt u isch e Ehemaligefahrt ungerem Motto "Bad Taste". Witeri Infos zu aune Fahrte folge speter.

Nöi gits es 11er Abi für Uswärtsfahrte. Du zausch 10 Fahrte, chasch aber 11 Mau mitfahre. Prise für Mitglieder CHF 300.- u CHF 400.- für Nid-Mitglieder.

 

Du chasch di diräkt hie mitem Formular amäude bis spetischtens am Abe vorem Match, Mitternacht. Speteri Amäudige, ou über das Formular, wärde nach Ygang berücksichtiget und wes Platz het, chöi die Lüt ou mitcho. D Amäudigsigäng wärde jewilis spetischtens 1,5 Stund vor Abfahrt in Langnau kontrolliert. Aui Amäudige si verbindlech, wüu d Plätz im Car beschränkt si. Wär sich amäudet u nid uftoucht, mues d Fahrt glich zahle.
 

Hier kannst du dich für die Auswärtsfahrten mit dem Fancar anmelden. Preise werden noch bekannt gegeben. Je nach Zielort sind diese unterschiedlich. Bedingung, dass ein Car fährt: es müssen mind. 20 Personen angemeldet sein. Anmeldungen via Formular sind bis am Vorabend um Mitternacht möglich, spätere Anmeldungen werden nach Eingang und verfügbaren Plätzen berücksichtigt. Letzte Kontrolle der Anmeldungseingänge ist jeweils 1,5 Stunden vor Abfahrtszeit in Langnau.