Spieler- u Trainerpateschafte

Mir bechöme o ir Saison 2026/27 wieder ä Verteidiger. Dasmau der Noah Meier.
Was es Spanneds über ihn z säge git, erfahrit dir chli speter, mir tüe ne de am Spielerpateträffe usfrage.
 

Mir si drbi gsi wo der Tim sis erschte Goal ir National League gmacht u o woner wäge em Usfau vom Juso Riikola plötzlech e grossi Roue het übernoh. Är het e sehr starchi erschti Saison im Team vo de Tigers gspiut.
 

Mitem Tim u em Jiri heimer zwe ganz jungi Spieler gha. Dr Tim früsch zrugg us de Amerikanische Juniorelige u meischtens bi Chur im Isatz. Dr Jiri im 2023 früsch draftet worde u aui si sich einig, dass er dr nächscht Langnouer ir NHL chönnt wärde.

Viu hei sech d Ouge gribe, womer dr Stéphane als zwöite Goalie verpflichtet hei. Aber hüt wüsse mer was ir Saison 2023/24 für ne steile Ufstieg agfange het. Dr Fänclub het wieder e gueti Nase gha.

 

Mitem Joel Salzgeber heimer eine gha, wos vo de Young Tigers ids Kader vo de Grosse gschafft het. Dr Walliser isch uszoge, um z Langnou fuess z fasse. Bis hüt ischer der Center vo dr vierte Linie u zueständig d Gägner mit der energetische Art z närve u beschäftige.

Mitem Livio isch e junge Spieler vo Zug cho. Auso grad vom früsche Schwiizermeischter. Klar heter dert no nid di tragendi Roue gspiut, het aber ghofft bi de Tigers dr nächscht Schritt z mache.



 

Mit de Trainerpateschafte vom Rikard u em Jens heimer d Serie vo Trainer u Assistänt z dritte mau i Serie fortgsetzt. E Hattrick, weme so wot. U drum när zu de Spieler gwächslet ;-).
 

Ja, never change a winning Team, drum doch eifach nomau glich. Wieder Trainer u Assistänt, o wenns nach der geniale Vorsaison nüm ganz glich gloffe isch. Dr Fänclub het d Serie vo de Trainerpateschafte usbout.

Wüsst er no dr 2. März 2019? Mir hei d Playoff-Quali gfiiret. Oftmaus vo viune aus beschti Saison sit 2010/11 bezeichnet u das o dank de beide Trainer Heinz u Rikard.