Weisch-no-Momänt
Ab u zue dörfe mir o Meilesteine erläbe. Momänte wo sech fescht i Erinnerig vo jedem Fän ibrönne. Drum himer für die hie e eigeti Rubrik. Mau luege wenn dr nächscht Weisch-no Momänt drzue chunnt. Viellech ja scho i dere Saison.
Greenday: erschti Playoffquali am 22.02.2011
D Saison 2010/11 isch äue die mit Abstand beschti Saison gsi, was d Stimmig u di ungloublech vile Fäns betrifft, wo immer a Mätsch si cho. Ide Playoffs gäge d Houptstedter hei mir de aus verlore, aber es grüens Fescht isch glich gsi!
Sanierig Ilfishalle 2013
Am 20. Oktober 2012 het d Ilfishalle, wo sit über 50 Jahr ds Deheime vo de SCL Tigers isch, d Türe nach nume sächs Mönet Bouzyt für d Fäns ume uftah. Mit viu iiheimische Büezer, Unternähme u Material us dr Region isch d Haue erneueret u modernisiert worde, dr Charakter isch aber blibe. D Ilfishalle isch hüt no Kult.
Zugfahrt uf Ambri
Am 4. Jänner 2009 si 777 Fäns rot-gäub kleidet mitemne Äxtrazug uf Ambri gfahre. Die Sonderfahrt hets alässlech vom 30jährige Bestehe vom Fänclub SCL Tigers gäh. Dr Zug het den äxtra für üs am Bahnhof ghaute, wo süsch nüm im Betreb isch. Natürlech hei den ir aute Valascia ou di legendäre Pauli-Burger und d Marroni nid dörfe fähle.