Gschicht vom SC Langnou / de SCL Tigers
Am 30. Jäner 1946 isch der SC Langnou gebore u sithär i üsne Härze nüm wägzdänkä. Denn im Winter 1946 het äuä no niemer gahnet, zu was dass dä Club no wird wärde. Dr gröscht Erfoug vo dr Clubgschicht isch dr Meischtertitu im Jahr 1976, wome daheim ir nöi überdachte Kunstiisbahn, namentlech dr Ilfishaue, gäge EHC Biu dr erscht u bishär einzig Meischterpokau het gwunne. Dr Spielertrainer Jean Cusson het denn im 76i mitere Mannschaft, wo vor auem us Iheimische bestange het, Gschicht gschriebe u unvergässlechs gschaffe. Ganzi 24 Jahr isch me unungerbroche ir NLA gsi, drbi isch me nün mau hingerenang mindestens ufe dritt Rang cho. Zämä mite Rivale us Bärn u Biu het me ide 70er-Jahr d Liga dominiert. D Erfouge vo denn si bi de Fans immer no presänt u macht d Langnouer Fangmiin bis hüt stouz.
Wo du i de 80er-Jahr gseh hesch, wis geng meh ums Gäut isch afe ga, u mä grossi Löhn het afe zahle, isches für d Dorfclubs wie Langnou u Arosa geng wie schwieriger worde, mit de Bonze us Bärn, Lugano u Züri mitzhaute. Afangs vo de 90er-Jahr isch dr SC Langnou finanzieu u sportlech am Ändi gsi u d Tigere si i d Erstliga abgstige, Gäut isch o kes me ume gsi. Für viu Lüt isch denn ä Wäut zämäbroche. Die wenigste hei no dra gloubt, dass dr Kultclub usem Ämmitau no cha grettet wärdä. Doch d Hoffnig stirbt ja bekanntlech zletscht. Dr Simu Schenk isch cho u het d Hoffnig zrügg brunge ids Tau vo de hüülende Winde. Är het der Charre usem Dräck zoge u het Heudestatus erlangt. Är het "auti Spieler" wie ä Jürg Berger oder ä Rolf Tschiemer wieder aktiviert u drzue no ä Huufe Juniore i die erschti Mannschaft integriert. Die nöi zämägwürfleti Mannschaft, wo fasch komplett us Ämmitaler bestange het, isch nach nume äre Saison zrügg id NLB ufgstige. Äs Jahr speter ischme zwar nomau id Erstliga abgstige. Wius dä junge Giele no chli ar Erfahrig gfäut het, hets nomau ä nöie sportleche Alouf ir Erstliga brucht. D Erfahrig het me du aber grad denn mit Nämä wie Gerber, Moser u Hirschi uf Langnou ghout. Dr Paradesturm mit Turbo-Moser, Hirschi Küsu u Gerber Wale het d Gägner schwindlig gspiut u der SC Langnou mitem ernöite Wiederufstieg ändgüutig zrügg id NLB brunge u d Erstliga hoffentlech für aui Zyt vergässä gmacht.
Was us dr Erstliga-Zyt bis hüt unvergässä isch blibe, isch die gränzälosi Tröii vo de Fans. D Ahänger vo Nah u Färn hei dr SCL idr schwierigschte Zyt nid la gheie u hei dra gloubt (wär nid dra gluubt, isch ke Tiger), dass Langnou irgendwenn wieder wird dert härä cho, wo si härä ghöre.
Wyt über 4000 Fans si dennzumau a d Erstliga-Heimspiu pilgeret. Hunderti, ja mängisch sogar Tuusegi si ad Uswärtsspiu mitgreist u hei Langnou so unstärblech gmacht.
Afangs 90er-Jahr, bir letschte Rückchehr id NLB, im letschte u entscheidende Spiu in Uzwil gäge Wil si 2500 Gäubi u Roti derbi gsi. Bide Ufstiegsheimspiu gägä Visp u Wil isch d Ilfishaue mit 7000 Fans beidi mau vou gsi. Wahnsinn, so öppis isch nume z Langnou müglech!
Nach paar Saisons ir NLB isch Langnou am 7. Apriu 1998 ir usverchoufte Ilfishaue im auesentscheidende Spiu ir Verlengerig gäge Herisou dert härä zrügg kehrt, wome härä ghört: id NLA. Mit derbi den immer no der Wale Gerber! O är het bi üs Heudestatus erlangt. Leider isch är viu zfrüech gstorbe. Aber sis 44i hanget ungerem Stadiondach, isch gsperrt u wird nüm vergä. Äbäfaus gsperrt isch d Nr. 26 vom Tinu Gerber u d Nr. 17 vom Daniel Aegerter. Die zwöi hei bim Wiederufstieg id NLA o ä grosse Teu drzue biitreit u hei ussertdäm mängi Saison für üser Farbe gspiut. Äs witers Nummero, wo nüm vergä wird, isch z 12i vom Todd Elik. Är isch äuä eine vode beste usländische Spieler, wo je z Langnou hei gspiut. Mit sire Spiuwis u sim grosse Kämpferhärz het o är Kultstatus erlangt u isch bis hüt ä Heud.
Im Jahr 2009 isches um d Tigers wiedermau gnau gstange. Üse SCL het denn grossi Gäudproblem gha. U wieder hets ä Retter brucht. U es si grad mehreri Retter us dr Region igsprunge. Agfüert vom Verwautigsratspräsidänt Peter Jakob u vom Gmeindspresi, am Antener Bärnu, hei si zämä mit angerne Gschäftsmanne, Fans u witerne wichtige Ungerstützer üse Club wieder saniert.
Uf Atrieb vom Peter Jakob isch 2012 üsi gliebti Ilfishaue wunderschön saniert worde. Drbi hetme Auts mit Nöiem vermischt u so dr Geischt vor Ilfishaue chöne wahre. Dass üses Hockeystadion o nach dr Sanierig bis hüt geng no Ilfishaue heisst, isch für üs Fans vo extrem grosser Bedütig. Üses einzigartige Stadion isch für üs äs grosses Stück Heimat, u üse Club isch für viu Lüt wie ne Art Religion.
Dr Peter Jakob isch für üs ä unheimlech wichtige Maa. Ihm heimer ganz viu z verdanke. Är het mit sire ehrleche, bodeständige u vouksnahe Art lengst Kultstatus erreicht. Danke für Aues, Peter!
Leider si d SCL Tigers im Jahr 2013 ir erschte Saison ir nöisanierte Ilfishaue id NLB abgstiege. Doch ufgä het o denn niemer. Dr Peter Jakob u siner Lüt, aui Mitarbeitende uf dr Gschäftssteu u ä Huufe Spieler si trotz Abstieg z Langnou blibe u hei sofort dr Wiederufstieg i Agriff gno.
O mir Fans hei denn einisch me zeigt, dass mir üsem SCL i schwierige Zyte nid dr Rügge tüe chere. Nid viu weniger Zueschouer si cho aus ir NLA, u mir hei o ir NLB jedes Spiu zumene Fescht gmacht.
Im Jahr 2015 isch me suverän B-Meister worde u aschliessend ir Ligaquali gägä Rappi grandios id NLA zrüggkehrt.
Sithär ischme ir NLA wieder ä feschte Bestandteu u het bis itz o am Corona guet chöne trotze.
Hoffe mer, dass üses Ämmitaler Hockey o ir Zuekunft so erfougrich, bodeständig u ehrlech blibt. U dass mir dä Grosse us de Stedt no mängisch chöi ä Scheich steue u so üses eifache u ländleche Tau positiv id Schlagziele bringe.